Пекинг, 19 септември 2014 (МИА) - Британската компанија „ГлаксоСмитКлајн“ (ГСК) една од најголемите во фармацевтската индустрија во светот, е осудена од судот во кинескиот град Чангши, да плати казна од 490 милиони долари, за давање поткуп.
Станува збор за рекордно висока парична казна што во Кина е изречена за една странска компанија.
ГСК беше обвинета дека нејзините функционери во кинеската филијала, им давале пари и разни подароци, на домашните лекари и на тамошни болници, за да ги препишуваат и да ги купуваат нејзините лекови.
Судот го осуди поранешниот директор на ГСК за операции во Кина, Марк Рајли на условна казна затвор од три години, па тој ќе биде протеран од Кина.
Неколкумина други функционери на кинеската филијала на ГСК, исто така, се осудени на условни казни затвор.
Во јули минатата година, кинеските власти соопштија дека водат истрага против британската фармацевтска компанија, означувајќи го сличајот како најголем корупциски скандал со кој била опфатена една странска компанија во Кина.
„ГлаксоСмитКлајн“ беше обвинета дека на тој начин направила профит од 150 милиони долари.
Во соопштението по повод пресудата,се изразува жалење поради целиот случај во кој беа вмешани функционери на компанијата и ГСК јавно им се извини на владата на Кина и на кинескиот народ.