Одложен штрајкот на ЧСА Прага, 24 октомври 2014 (МИА) - Најавениот штрајк на персоналот на чешкиот авиопревозник ЧСА, нема да се одржи на 30 октомври поради компромис на Синдикатот и раководството на компанијата, јави дописникот на МИА од Прага.
Раководството на ЧСА, кое од вчера во рамки на реструктуирање на фирмата започна со делење откази, се согласи да го намали бројот на вработени кои ќе ги отпушти и на кои ќе им ги намали платите, доколку ресорниот Синдикат го отповика најавениот штрајк.
- Постигнатото решение не значи победа ниту пораз, за ниту една од страните. Задоволен сум дека преовладуваа фактите, компромисот и одговорноста на компанијата над емоциите, изјави претседателот на Сојузот на синдикати за транспорт, Лукаш Помајбик.
Штрајкот беше закажан поради најавените откази на 77 пилоти, 66 вработени во администрацијата и над 170 членови на екипажот.
ЧСА, минатата година ја заврши со загуба од 34,1 милиони евра и компанијата каде мнозински сопственички удел има државата, за рестрикциите доби поддршка и од малцинскиот сопственик Кореа еар.
Во моментот, ЧСА има вработено 230 пилоти, 400 членови на останатиот екипаж и речиси 270 административци. Во 2010, оваа компанија имаше над 2.000 вработени.
|