Земјите од Г-20 се договорија да го зајакнат економскиот раст

Бризбејн, 16 ноември 2014 (МИА) - Лидерите на земјите од Г-20, кои учествуваа на дводневната средба во Бризбејн, се договорија за серија мерки, кои ќе дадат поттик на нивните економии со дополнителни 2,1 проценти во наредните пет години преку поттикнување инвестиции во инфраструктурата и трговијата.

Во завршната декларација се наведува дека ако иницијативата за два билиони долари биде до крај исполнета, светскиот БДП ќе се зголеми за 2,1 проценти над очекуваните нивоа до 2018 година и ќе бидат создадени милиони работни места.

Лидерите на најбогатите држави се договорија да работат заеднички, за да го ограничат затајувањето даноци и корупцијата, како и да ги зацврстат финансиските институции, за да избегнат повторување на светската финансиска криза од 2018 година.

Во нивните ангажмани беше вклучена и поддршја за „силни и ефикасни дејствија за справување со климатските промени“.

Во Бризбејн лидерите на САД и Европа имаа директни преговори со цел да биде постигнат што е можно поголем напредок за сеопфатен и амбициозен договор за Трансатланското и инвестициско партнерство.

Извршниот директор на ММФ Кристин Лагард, која учествуваше на самитот, ја определи 2014 како „најпродуктивна година за Г-20“.

Во 2016 година средбата на врвот на Г-20 ќе се одржи во Кина.

Г-20 вклучува 19 земји (Аргентина, Австралија, Бразил, Велика Британија, Германија, Индија, Индонезија, Италија, Канада, Кина, Мексико, Република Кореја, Русија, Саудиска Арабија, САД, Турција, Франција, Јужна Африка и Јапонија) и ЕУ.