Скопје, 19 ноември 2014 (МИА) - Владата им наложи на институциите во наредните два дена да ги испитаат информациите за наводниот реекспорт на земјоделски производи од ЕУ во Русија.
Како што соопшти денеска министерот за економија Беким Незири, во деталните анализи ќе бидат вклучени МВР, Царинската управа, Агенцијата за храна и земјоделство и Државниот инспекторат за земјоделство.
Ова, рече Незири, е договорено на вчерашната владина седница.
- Ќе направиме детално истражување и ако утврдиме дека постои такво нешто, ќе се преземат сите законски мерки за покренување кривични постапки против поединците или фирмите кои го направиле тоа, нагласи министерот.
Според него, од руска страна има само сомнеж дека Македонија извезува овошје и зеленчук од ЕУ во Русија, но тоа се уште не е докажано.
Загриженост од состојбата искажа и министерот за земјоделство, шумарство и водостопанство Михаил Цветков кој посочи дека во најкраток можен рок ќе се расчистат сомнежите.
- МЗШВ заедно со другите институции ќе направи анализа на состојбите и во најкраток можен рок ќе одговори на барањето на руската страна, изјави Цветков.
Одговарајќи на новинарско прашање, заменик амбасадорот на САД Бартон Путни порача дека земјите од регионот имаат огромен потенцијал за меѓусебна соработка и на тоа треба да се фокусираат.
Руската служба за ветеринарен и санитарен надзор побарала од македонските служби во рок од една недела да пратат материјали за системска проверка на извезените производи, како и заклучоци за автентичноста на фитосанитарните сертификати. Македонија треба да докаже дека овошјето и зеленчукот што ги извезува во Русија се македонски.