Граѓаните на Крива Паланка ги избраа програмите за кои ќе се дискутира на Буџетскиот форумКрива Паланка, 20 ноември 2014 (МИА) - На втората форумска сесија во Крива Паланка, која се одржа синоќа, граѓаните ја продолжија работата околу изготвувањето на општинскиот буџет за 2015 година, во рамките на спроведувањето на буџетскиот форум, кој е дел од програмата „Форуми во заедницата“.
На оваа сесија, од страна на раководителот на Одделението за финансиски прашања Татјана Ѓоргиевска, учесниците беа информирани за планираните и реализирани приходи до 30.09.2014 година, како и за планираните приходи на општина Крива Паланка за 2015 година. Истовремено, беше презентирана и листата на приоритети за развој на општината за наредната година, изготвена според предлозите на граѓаните, кои на општо задоволство можеа да заклучат дека најголем дел од нив можат да бидат прифатени и вклучени во општинскиот буџет.
Учесниците, предлагаа и нови и дополнителни извори за зголемување на приходите на општината, како што се воведување такси за паркирање, туристичка такса, донации од иселеници и други извори, зголемување на процентот од ДДВ наменет за општините и слично.
На втората форумска сесија детално беа претставени 9 буџетски програми, а според гласањето на работните маси, учесниците одлучија на следните сесии да расправаат и да дискутираат за пет од нив, односно за програмите за урбанистичко планирање, за уредување на градежно земјиште, за развој на локалната патна мрежа, за култура и за социјална заштита.
|