Кавадарци, 26 март 2015 (МИА) - Мини саем за хемиски препарати, опрема и механизација за земјоделството се одржува од денеска на плоштадот во Кавадарци.
- Целта на манифестацијата е на едно место да ги собереме производителите и дистрибутерите на пестициди и заштитни средства, ѓубрива, расаден материјал, опрема и механизација за обработка на земјоделски култури, системи за наводнување, опрема и средства за производство и чување на ракија и вино, кои ќе се промовираат пред тиквешките земјоделци, изјави Јован Еленов, претседател на Здружението „Винотек“ - организатор на саемот.
На дводневниот саем е најавено тематско предавање „Патот на успехот за добро вино“ на професор доктор Ѕвонко Божиновиќ од Факултетот за земјоделски науки и храна при Универзитетот „Св.Кирил и Методиј“ во Скопје.
- Саемот е можност да се видат најновите трендови во аграрот кога се во прашање опремата за обработка на земјата, заштита на растенијата и зголемување на приносите во земјоделството. Веруваме дека овде ќе се воспостават бројни контакти кои во иднина ќе ја унапредат земјоделската дејност и подобрат економијата во државата, вели Еленов.
Настанот ќе биде збогатен и со културно уметничка програма.