Скопје, 27 април 2015 (МИА) - Физичките и правните лица од приватниот сектор со помалку од 50 вработени ќе бидат ослободени од законската обврска за водење на канцелариско и архивско работење, а за компании со 50 и повеќе вработени, ќе следат олеснувања, односно ќе имаат обврска да водат единствено основна евиденција.
Ова го предвидуваат измените на Законот за архивско работење што се иницирани од Сојузот на стопански комори на Македонија (ССК).
- Доставената иницијатива од страна на ССК, на барање на илјадници компаниите членки, до надлежните институции, во насока на поедноставување на канцелариското и архивското работење за приватните субјекти е усвоена. На заедничкиот настан одржан на 10.03.2015 година на ССК и Министерството за информатичко општество и администрација на Република Македонија, надлежниот министер Иво Ивановски, најави дека сме единствени кои имаат поднесено иницијатива за подобрување на начинот на функционирање на Законот за архивско работење. Истата, Владата на Република Македонија ја усвои врз основа на предложените измени, соопшти ССК.
Оттаму посочуваат дека позитивно од Законот за архивско работење е што компаниите беа запознаени за документарниот материјал и роковите на негово чување.
- Веруваме дека и во иднина како и досега, ќе продолжиме успешно да ги застапуваме интересите на компаниите и заеднички да делуваме во подобрување на условите за водење бизнис. Во изминатиот период на барање на ССК, усвоени се иницијативите за измена во законот во делот на реинвестираната добивка, задолжителна задолжница, како и останати законски измени од голема важност за компаниите, посочуваат од ССК.