Седница на Комисијата за труд и социјална политикаСкопје, 27 април 2015 (МИА) - Собраниската Комисија за труд и социјална политика денеска ги усвои Финансискиот план на Агенцијата за супервизија на капитално финансирано пензиско осигурување (МАПАС) за 2015 година и Предлог одлуката за давање согласност на Одлуката за висината на месечниот надомест за 2015 година што МАПАС го наплаќа од пензиските друштва.
МАПАС за годинава има планирани приходи во висина од 43 милиони 993 илјади денари, а планирани расходи во висина од 43 милиони и 166 илјади денари. Приходите во најголем дел или 40.543 денари се од месечни надоместоци од придонеси што ги наплаќа од пензиските друштва.
Членовите на Комисијата од МАПАС побараа годинава да ги намалат непродуктивните трошоци, како трошоци за бензин, мебел, такси, за телефонски сметки...
Претседателот на Комисијата Благоја Деспотовски рече дека треба да се инвестира во заштеда на енергија, во возила кои помалку трошат, како и во професионална надградба, знаење и вештини.
Комисијата на седницата ја усвои и одлуката за давање согласност на Одлуката за висината на месечниот надомест за 2015 година што МАПАС го наплаќа од пензиските друштва.
Надоместокот останува на законски утврдените 0,8 проценти од уплатените придонеси во сите пензиски фондови со кои управуваат пензиските друштва.
|