Јоргос Папандреу прелага референдум за евентуалниот компромис со кредиторите

Атина, 22 мај 2015 (МИА) - Поранешниот грчки премиер Јоргос Папандреу предлага да се организира референдум за ратификација на евентуалниот компромис со кредиторите на неговата земја, искажувајќи убеденост дека на него Грците ќе гласаат „за“, бидејќи „сакаат да останат во еврозоната“, објави весникот „Та неа“.

Владата траба да договори компромис со европските партнери и потоа да го стави на референдумско изјаснување. Ако има спогодба со кредиторите, Грците ќе гласаат „за“, изјави Папандреу на конференција во Лисабон. 

Поранешниот грчки премиер потенцира дека „огромното мнозинство Грци сакаат нивната земја да остане во еврозоната и покрај страдањата што ги трпат од неа, бидејќи еврото го сметаат за стабилна валута“.

- Доколку Грците кажат „да“, ние како земја ќе ја реализираме оваа програма и тоа ќе ги смири германските даночни обврзници, изјави Папандреу пред новинарите во Лисабон.

Тој потенцираше дека „времето притиска, бидејќи земјата ризикува на крајот на мај или на крајот на јуни веќе да не може да го обезбеди исплата на платите на државните службеници“.