Германија неколку дена е зафатена од топлотен бран, а вчера во баварскиот град Кицинген измерени се рекордни 40,3 Целзиусови степени, соопшти Германската метеоролошка служба.
Тоа е највисока температура на воздухот забележена во Германија од 1881 година, откако се водат метеоролошки податоци. Досегашниот рекорд беше 40,2 степени.
Како што јави дописникот на МИА од Берлин, уште поголема температура е измерена на Универзитетот во Карлсруе, кој не се смета за официјална мерна станица.
Инаку, покрај во Германија и во Холандија, Велика Британија, Тајланд и Колумбија овој јули се измерени највисоките температури во историјата.
Екстремно топлото време се очекува да продолжи и во наредните три дена кога најзагрозени ќе бидат Германија, Швајцарија и Австрија, по што топлиот бран се очекува да се спушти во Југоисточна Европа.