Американски војници во септември преку Чешка на воена вежба во УнгаријаПрага, 30 јули 2015 (МИА) - Чешкиот министер за одбрана Мартин Стропницки најави дека во септември на планираниот трансфер на американските војници преку Чешка на воена вежба во Унгарија ќе учествуваат 100 воени возила и неколку стотици војници.
Иако деталите допрва ќе се прецизираат, сепак Чешка веќе има искуство со поминување на воен конвој низ нејзината земја пролетва, кога имаше голем интерес од јавноста, јави дописникот на МИА од Прага.
Во конвојот, кој е наречен „Дунавско патување“ се планира префрлување на американски војници преку Чешка и Словачка од Германија до Унгарија.
Војската и техниката во Чешка ќе се задржат помалку од 48 часа, со едно преспивање на војниците и за тоа е потребна одлука на чешката Влада.
Сличен конвој низ Чешка помина на преминот на март-април кога освен незадоволство на критичарите кои изразуваат симпатии кон Русија, беше искажана и поддршка од илјадници поддржувачи на американската војска.
|