Москва, 25 ноември 2015 (МИА) - Соборениот руски бомбардер Су-24М крај турско-сириската граница не добил никакви предупредувања од турска страна за нарушување на воздушниот простор, изјави денеска преживеаниот пилот Константин Мурахтин.
Според него екипажот не добил предупредувања ниту по радио-врска ниту визуелно.
- Ако сакаа да не предупредат може да се покажат, да застанат на паралелен курс, рече Мурахтин.
Тој истакна дека проектилот бил испукан одзади и екипажот не бил во можност да изврши маневар.
Рускиот Су-24М беше соборен во вторникот со ракета воздух-воздух од Ф-16 на турските ВВС. Двата члена на екипажот се катапултираа, но едниот загина, а другиот беше спасен по 12-часовна операција, во која беше уништен хеликоптер Ми-8 и убиен еден руски специјалец.
Мурахтин изјави дека тој и колегата многу пати летале во тој реон и оти се враќале во базата безбедно.
Тој изјави дека го познава многу добро реонот и може да се ориентира во него и без да користи дополнителни електронски инструменти од авионот.