Туск: Во Сирија сите треба да се борат против ИДЗагреб, 25 ноември 2015 (МИА) - Уривањето на рускиот воен авион од страна на Турција претставува опасна ситуација, но сите мора да останат со „студени глави“ и да се насочат кон борба против џихадистичката група Исламска држава (ИД), порача денеска во Загреб, претседателот на Европскиот совет, Доналд Туск.
- Постои само еден начин за избегнување на вакви инциденти во иднина, а тоа е насочување на сите ресурси во борба прптив ИД, изјави Туск, кој во Загреб присуствуваше на регионалниот Самит Брдо-Бриони.
Според него, заедничка цел на целата меѓународна заедница треба да биде борбата против ИД
- Сите треба да знаат дека никогаш нема да се формира коалиција против умерната опозиција, порача Туск.
Рускиот авион Су-24 беше собрен вчера претпладне од страна на турски ловец Ф-16, откако, како што тврди Анкара, леталото го нарушило воздушниот простор на Турција. Руското Министерство за одбрана од своја страна соопшти дека нивниот авион летал во набљудувачка мисија над сириската територија и не го повредил турскиот воздушен прпстор.
Рускиот претседател Владимир Путин изјави дека постапката на Турција претставува „нож забоден во грбот на Русија“ и ја предупреди Анкара на сериозни последици поради соборувањето на авионот.
Турскиот премиер Ахмед Давутоглу ја оправда постапката на армијата, објаснувајќи дека Турција мора да ги брани своите граници и својот воздушен простор.
НАТО и ЕУ синоќа апелираа за продолжување на контактите меѓу Анкара и Москва и повикаа на смирување на тензиите и на деескалација на состојбата.
|