Француското Собрание одобри продолжување на воздушните напади во Сирија

Париз, 25 ноември 2015 (МИА) - Француското Национално собрание вечерва со огромно мнозинство го одобри продолжувањето на мисијата за воздушни напади на авионите на Военото воздухопловство на Франција во Сирија, јави ТАСС. 

За продолжување на мисијата гласаа 515 пратеници во Собранието, а против беа само четворица.

Согласно францускиот Устав, Владата на Франција мора да добие одобрение од Парламентот за спроведување воени операции надвор од границите на земјата, кои се подолги од четири месеци.

Француските воени авиони започнаа со напади врз позиции на џихадистичката група Исламска држава во Сирија на 27 септември. Пред тоа, француските авиони беа вклучени во операциите на меѓународната коалиција, предводена од САД, против ИД само во Ирак, но не и во Сирија.