Во Париз ќе се одржи средба на градоначалници паралелено со конференцијата за климата

Париз, 30 ноември 2015 (МИА) - Ал Гор, Роберт Редфорд, Арнолд Шварценегер се меѓу учесниците на средбата на градоначалниците, организирана од градоначалничката на Париз, Ан Идалго и поранешниот градоначалник на Њујорк, Мајкл Блумберг, која ќе се одржи паралелно со 21. меѓународна конференција под покровителство на Обединетите нации во борбата против климатските промени. 

Поканети се околу 900 лица. Американскиот актер и режисер Роберт Редфорд ќе биде еден од говорниците од името на еколошката невладина организација „Светот за заштита на националните ресурси“.

Поранешниот гувернер на Калифорнија, актерот Арнолд Шварценегер ќе ја претставува организацијата за климата „Р20“, поранешниот заменик-претседател на САД и активист за заштита на животната средина Ал Гор ќе говори во име на „Проектот за климатска реалност“.

На средбата ќе учествуваат градоначалниците на Барселона, Рио де Женеиро, Сиднеј, Монтреал, Лос Анџелес, Чикаго, Истанбул, Стокхолм, Дакар, Мадрид, Јоханесбург, Сеул, Берлин, Сантијаго.