Тројца загинати во експлозија на противпешадиска мина во источна Украина Доњецк, 10 февруари 2016 (МИА) - Три лица утринава загинаа во источна Украина, кога минибус нагази врз противпешадиска мина на неутрална територија меѓу сепаратистичките бунтовници и владините сили, пренесоа американските медиуми.
На местото на несреќата загинале возачот и една патничка, а вториот патник заради степенот на здобиени повреди починал во болница.
Мината била подметната на патот западно од Доњецк, град што е заземен од бунтовниците, посочи обвинителството на Доњецката област, што е под контрола на киевските власти.
Очевидци на настанот раскажуваат дека минибусот се обидел да ја заобиколи мината и да ја избегне колоната превозни средства што чекале да влезат на територикјата што е под контрола на Владата.
И украинските, но и бунтовничките сили, често пати, поставуваат знаци што предупредуваат за поставени мини крај патот. Денеска, меѓутоа, на оваа делница од патот на ничија територија, што неколкупати преминувала од рацете на едните во рацете на другите завојувани страни, немало таков знак за предупредување.
Жена, која со родителите и своето мало дете чекала да премине на територијата контролирана од украинските власти, изјави дека пресекувањето на линијата на разграничување во источна Украина секогаш е многу стресно.
-Страшно е. Стравуваме не само да не паднеме од патот, туку дури да стапнеме надвор од асфалтот, рече таа.
|