Словачката владејачка партија ја губи поддршката неколку недели пред избориПрага, 11 февруари 2016 (МИА) - Опаѓа поддршката на евентуалните гласачи за партијата на актуелниот словачки премиер Роберт Фицо, на три недели пред парламентарните избори, покажуваат најновите анкети во земјата.
Резултатите, 34-процентна поддршка, која за два проценти е помала од истиот период лани, покажуваат дека партијата Смер би го изгубила апсолутното мнозинство во 150-члениот Национален совет, јави дописникот на МИА.
Според аналитичарите, на Фицо му наштетија штрајковите и неговата анти- миграциска реторика, а не му оди во корист ниту најновата афера со лекарот кој, со Владата има потпишано поволен договор за исплата на здравствено осигурување за неговата болница која нуди масерски услуги. Најновата афера ја објави опозицијата.
- Главната причина за опаѓањето на бројот на симпатизерите е фактот, дека темата на мигрантите ги „покри“ изборните теми, изјави за словачкиот весник „Хосподарске новини“ шефот на агенцијата „Фокус“ Мартин Слосиарик.
Тој додава дека свое влијание имале и штрајковите на просветните работници и медицинските сестри, како и аферата со „масерот“ Павел Костка.
Неговата клиника, според објавените документи од Владата во 2012 имала обрат од 140.000 евра, а две години подоцна нејзиниот приход се зголемил на 1,4 милиони евра.
Опозициската партија „Мрежа“, која го повика Фицо да го прекине неповолниот договор, според анкетата, е на второ место, со 14 проценти гласови.
|