Најмалку четворица убиени во гранатирање на контролен пункт во Источна Украина

Донецк,27 април 2016 (МИА) - Најмалку четири лица се убиени, меѓу кои и една бремена жена,  за време на гранатирањето на контролен пункт, во Источна Украина, соопштија денеска проруските бунтовници.

Портпарол на „Донецката Народна Република“ изјавил дека се повредени 15 лица, додека минувале од страната што ја држат бунтовниците, во делот кој е под контрола на владините сили.

Целиот реон во изминатите недели беше поприште на насилство, заканувајќи му се кревкото примирје што е на сила, меѓу украинската армија и бунтовниците.

ОБСЕ потврди дека посматрачите на Организацијата регистрирале голем број повреди на прекинот на огнот, со стотици ексползии и истрели од огнено оружје кои се слушаат како од реонот каде се бунтовниците, така и од делот што е под  контрола на украинските владини сили.

Денешниот инцидент се случи во селото Оленивка, кое е под контрола на бунтовниците, многу блиску до демаркационата линија која ги раздвојува двете завојувани страни.

Бунтовниците тврдат најмалку шест куќи, како и една болница се погодени и оштетени во текот на денешното гранатирање, како последица на нападите што ги извршиле украинските владини сили.

Претставник на армијата во Киев изјави дека имало истрели од лесно оружје, но дека не се точни тврдењата за гранатирање и ракетирање на одредени позиции на линијата на прекинот на огнот.