Брисел, 4 мај 2016 (МИА) - Европската комисија (ЕК) предложи создавење европска Агенција за давање азил, како решение на миграциската криза, денеска изјави еврокомесарот за миграција, внатрешни работи и држајанство, Димитрис Аврамопулос, цитиран од ТАСС.
- Предлагаме создавање европска Агенција за прашањата за давање азил. Тоа ќе биде главниот чекор за реформирање на нашиот систем за давање азил, таканаречениот Даблински систем, забележа тој.
Суштината на Даблинскиот систем досега се состоеше во тоа што мигрантите можеа легално да побараат азил само во првата земја од Европската унија во која влегле. Системот во пракса престана да функционира со почнувањето на миграциската криза.
-Во новиот систем мигрантите ќе можат да побараат политички азил во цела ЕУ, а потоа европската Агенција за миграција ќе решава во која земја ќе им биде даден азил. Внимателно ќе се разгледува населението на соодветната земја, бруто домашниот производ, како и квотите за раселување на бегалците, забележа Аврамопулос.
„Распределувањето ќе биде автоматско, никој нема да може сам да си ја избира земјата во која сака да добие азил“, додаде заменикот претседател на ЕК, Франс Тимерманс.
За овој систем да може да профункционира неопходно ќе биде да го одобрат Европскиот Парламент и Советот на ЕУ.