Тирана, 30 јуни 2016 (МИА) - Италијанска крајбрежна полициска контрола заплени албански моторен чамец натоварен со 170 килограми марихуана во реонот меѓу градовите Бриндизи и Лече.
Според полициски извори, како што јави дописникот на МИА, чамецот, кој доаѓал од Албанија, бил пронајден во меѓународните води, но лицата кои биле во него го напуштиле и побегнале со друг чамец.
Чамецот прво бил заблежан од германски хеликоптер од европската контролна мисија во Медитеранот, по што веднаш биле известени италијанските власти.
Веднаш била организирана акцијата на италијанската полиција која го запленила чамецот и дрогата, но не успеала да ги пронајде и лицата кои ја шверцувале марихуаната.
По еден подолг период на затишје, ова е поголемо количество албанска марихуна запленета од италијанската полиција.
Во меѓувреме турската полиција уапси две момчиња и две девојки, албански државјани, откако во автобомил марка „Пасат“ со кој тие патувале, открила 20 килограми марихуана. Младите Албанци, како што изјавиле, сакале да поминат повеќедневен одмор во Турција.