Де Мезиер нареди засилено полициско присуство на јавни места по серијата напади во Германија

Берлин, 25 јули 2016 (МИА) - Германија ќе го засили полициското присуство на аеродромите и железничките станици и ќе спроведува операции од типот „запри и прегледај“ во близина на граничните региони, изјави денеска министерот за внатрешни работи, Томас де Мезиер, по четирите напади за помалку од една недела, пренесоа британските медиуми.

-Ова што во овој момент ми се чини особено важно е зголемувањето на полициското присуство на јавните места, рече министерот на прес конференција во Берлин.

„Затоа на федералната полиција и наредив видливо да го засили своето присуство на аеродромите и железничките станици и да спроведува случајни проверки (кои не се видливи, но се многу ефикасни) во граничните региони, рече тој.

Де Мезиер ги повика луѓето да не запаѓаат во паника, додавајќи дека „природно е тие да се загрижени и да се прашуваат дали да го сменат својот секојдневен распоред. Тоа не треба да го правиме, туку треба да продолжиме да го живееме нашиот слободен живот“, рече тој, цитиран од американските медиуми.