Уапсени уште две лица поради нападот во Ница

Париз, 26 јули 2016 (МИА) - Француската полиција денеска упаси двајца мажи поради поврзаност со нападот на шеталиштето во Ница, кога со камион беа прегазени и загинаа 84 луѓе.

- Одреден им е притвор додека полицијата се обидува да утврди дали напаѓачот, Тунишанецот Мохамед Лахуеџ Булел имал логистичка поддршка, изјави извор близок на истрагата.

Државното обвинителство верува дека Булел подолго време го планирал нападот, во кој со камион од 19 тони ги прегази луѓето кои уживале во огнометот на шеталиштето во Ница.

Досега се покренати обвиненија против четворица мажи и една жена за соучесништво во крвавиот инцидент.

Францускиот обвинител Франсоа Молан изјави дека преписката меѓу осомничените и Булел, кој е убиен во нападот од страна на полицијата, укажува дека тие заедно го планирале злосторството.

Одговорноста за нападот ја презеде Исламска држава, но иако полицијата во компјутерот на Булел пронајде фотографии и снимки од насилства кои ги извршила оваа група, сепак нема докази дека тој и бил лојален на џихадистичката организација.