Словенечката полиција во товарен брод од Турција пронајде 12 мигрантиЉубљана, 26 јули 2016 (МИА) - Словенечката полиција денеска соопшти дека во еден товарен брод, кој пристигнал од Турција, биле пронајдени 12 мигранти.
Во полициското соопштение се наведува дека група мигранти се обидела илегално да влезе во Словенија, криејќи се на бродот, чија дестинација било словенечкото пристаниште Копер.
Деветмина мигранти биле од Сирија, а тројца од Ирак.
Сите побарале азил во Словенија и се префрлени во прифатен центар.
Низ Словенија минатата година минале стотици илјади мигранти, но тој бран е прекинат кога балканските земји во март ги затворија своите граници за бегалците.
|