Алфано: Потенцијалните мигранти од Африка добро да размислат пред да тргнат по море за Европа

Рим, 28 јули 2016 (МИА) - Италијанската Влада денеска го означи почетокот на медиумската кампања, која ќе има за цел да ги откаже луѓето од Африка да мигрираат во Европа, предупредувајќи ги дека патувањето може да ги изложи на смрт и страдања, пренесе ДПА. 

Податоците на Меѓународната организација за миграција, која ја поддржува кампањата, покажуваат дека од приближно 250.000 лица, кои до овој момент по море дошле во Европа, над 3.000 загинале или се исчезнати во морските води.

-Ти, мигранту, кој се надеваш дека ќе го оствариш својот сон, се изложуваш на огромен ризик да западнеш во кошмар, изјави италијанскиот министер за внатрешни работи Анџелино Алфано при претставувањето на проектот пред медиумите.

Кампањата ќе го носи насловот „Информирани мигранти“.

Иницијативата, која е проценета на 1,5 милиона евра, предвидува емитување приказни низ медиумите на преживеани мигранти. Во секвенците што денеска беа емитувани пред новинарите, жена раскажа за обидот за силување, а маж за тоа како под закана од оружје го ризикувал својот живот, минувајќи го Средоземно Море со несигурен гумен чамец.

Кампањата, која е фокусирана на локалните радиостаници, телевизиски канали и социјални мрежи, треба да опфати 15 африкански земји, вклучувајќи ги и трите водечки земји на потекло на мигрантите кои пристигнуваат во Италија: Нигерија, Еритреја и Судан.

Алфано изјави дека цел на кампањата е да се разубедат економските мигранти, истовремени признавајќи дека луѓето кои бегаат од војните или од прогони веројатно и без тоа ќе се обидат да дојдат во Европа.

Тој додаде дека економските мигранти се 60 проценти од 154.000 лица кои минатата година пристигнаа во Италија.