Роми од едно украинско село биле иселени за да се одбранат од нападите на Украинците

Киев, 29 август 2016 (МИА) - Украинските власти одлучиле да ги иселат сите Роми од едно село во реонот на Одеса, откако локалните Украинци ги нападнале Ромите и нивните куќи, соопштено е во Киев, јави Би-Би-Си.

Инцидентот се случил веднаш штом било најдено мртвото тело на едно деветгодишно девојче, за кое полицијата се сомнева дека претходно било силувано.

Еден 21-годишен Ром е уапсен, осомничен дека го извршил убиството.
Селаните-Украинци од селото Лошчинивка, ги нападнале домовите на Ромите, кршејќи ги прозорците со камења и подметнувајќи пожари.

Ромите се обиделе да реагираат за да се одбранат, но побегнале, па полицијата тврди дека во нападот никој не бил повреден.

Украинската полиција тврди дека ситуацијата е ставена под контрола, откако се доведени дополнителни полициски сили, а Ромите со автобусите се селат на друга локација, подалеку од селото.
Во селото Лошчинивна, досега, живееле повеќе од 50 Роми.

Гуверенерот на Одеса, Михаил Саакашвили изјави дека „има разбирање за големиот гнев и револт“ на локалните Украинци.

„Антисоцијални елементи биле вмешани во масовно растурање на дрога„ напиша Саакашвили, поранешен претседател на Грузија, на Фејсбук.

Ова е првпат, Саакашвили кој претходно му се стави на располагање на украинскиот претседател Петро Порошенко, да се огласи како локален функционер во Украина.

Европскиот центар за правата на Ромите, претходно, предупреди дека оваа етничка заедница е изложена на силен притисок во Украина. Тамошните Роми се третирани како жители од втора категорија, често се цел на напади, а сите живеат во исклучително сиромашни услови.