Париз, 30 август 2016 (МИА) - Францускиот министер за економија Емануел Макрон најави дека ќе поднесе оставка од функцијата и дека ќе се посвети на неговиот претседателски план, јавува дописникот на МИА од Париз.
Неговата највена оставка само става крај на тензиите кои постоеа меѓу него, членовите на владата и претседателот Франсоа Оланд, кој го лансира во политиката.
Според повеќе извори, Емануел Макрон попладнево треба да ја поднесе оставката, подготвувана веќе подолго време. Неговото заминување од владата е резултат на тензиите и критичките позиции кои ги изрази кон економската политика, која требаше да ја спроведува, како и нетрпеливоста со премиерот Мануел Валс.
Емануел Макрон до пред само две години беше советник на претседателот и по доаѓањето на функцијата министер, користејќи ја непопуларноста на премиерот и претседателот, тој успеа да се наметне како кандидат на можното враќање на реформаторската левица. Неговата позиција се зајакна деновиве уште повеќе, откако и премиерот Валс е критикуван од страна на челновите на владата поради неговите позиции околу буркините.
Емануел Макрон не ги крие своите политички амбиции за највискоата функција во Франција, иако многумина му забележуваат дека никогаш не бил избран на избори и дека на функцијата министер дошол директно од советничка позиција кај претседателот, каде дошол како млад банкар.