Париз, 23 септември 2016 (МИА) - Поранешниот претседател на Франција Никола Саркози не ја исклучува можноста да распише референдум за излез на земјата од ЕУ во случај ако повторно биде избран за шеф на државата, јави телевизијата „Бе-Еф-Ем“.
Не исклучувајќи го одржувањето на плебисцит, Саркози наведе дека повеќе сака да зборува за реформите во ЕУ и посебно за француско-германското регионално лидерство, чиј концепт има намера да му го предложи на Берлин.
Саркози, кој се наоѓаше на чело на Франција од 2007 до 2012 година, претходниот месец соопшти дека има намера да се кандидира на претседателските избори во 2017 година.
Месецов, лидерот на партијата Национален фронт, Марин ле Пен, вети дека ќе распише референдум за членството на Франција во ЕУ доколку ја изберат за претседател во 2017 година.
Ле Пен изјави дека Франција има многу повеќе причини за излез од ЕУ од Велика Британија.