Бегалците во Германија, Германците во странство

Минатата година 138 илјади Германци ја напуштиле Германија во потрага по подобар живот во странство, објави германската статистичка служба „Дестатис“, пренесува дописникот на МИА од Берлин.

Според анализите на весникот „Ди Велт“ во последниве 10 години од Германија се иселени 1,5 милиони Германци од кои голем дел се високо образувани специјалисти. Според анализите бројот на исселени Германци се зголемил со воведување на политиката на отворени врати за бегалците од страна на канцеларката Меркел.

За експертите проблемот не е само поради речиси двојно повеќе странци кои што оваа година ќе пристигнат во земјата (околу 300,000)  од оние што ја напуштаат туку пред се во нивните различни капацитети да ја помогнат германската економија. Најголем дел од новодојдените мигранти немаат знаења кои што можат да бидат искористени во земјата поради што беа променети законите со кои во иднина многу полесно ќе бидат преотерувани барателите на азил кои што биле одбиени од германските власти. 

Разочарувањето на граѓаните со политките на владата во врска со имиграцијата најдобро може да се види од порастот на рејтингот на крајно десничарската „Алтернатива за Германија“ (АФД) која што веќе влезе во 10 од 16 покраински парламенти а на сојузните избори догодина може да освои меѓу 12 и 20 % од гласовите.
 
Наспроти АФД, владината коалиција меѓу СПД и ЦДУ/ЦСУ веќе загуби една третина од својот рејтинг во 2013 година и падна под 50 % поддршка во јавноста со што Германија најверојатно ќе треба да бара нови членови на владеачката коалиција на федерално ниво, процес кој што ќе ги засили разликите и спротивставеностите меѓу конзервативците и социјалдемократите.