Германската Влада одобри мерки за побрза депортација на мигрантиБерлин, 22 февруари 2017 (МИА) - Германската влада денеска усвои пакет мерки со кои треба да го забрза и поедностави процесот на протерување на одбиените баратели на азил и да се олесни процесот на утврдување на статусот на мигрантите, јави дописникот на МИА од Берлин. Според одобрените мерки, германските власти во иднина ќе имаат право да ги проверуваат мобилните телефони на новопристигнатите баратели на азил, кои ќе можат да бидат држени подолго време во депортациски притвор. Безбедносните служби од сега полесно ќе можат да започнат процедури за следење и мониторинг на сомнителни баратели на азил, а одбиените апликанти ќе може да бидат депортирани директно од прифатните центри без да имаат можност да се движат низ Германија. Овој потег на германската Влада во текот на викендот го најави шефот на кабинетот на канцеларката Ангела Меркел, Петер Алтмајер, кој соопшти за рекорден број на депортирани баратели на азил во 2017 година, во рамки на операцијата за чие спроведување во последниве два месеци по нападот на берлинскиот божиќен маркет беа извршени десетици координации меѓу низа политички лидери на федерално и покраинско ниво. Новиот пакет мерки за депортација на одбиените баратели на азил од страна на невладиниот сектор се нарекува „брутализација на депортацискиот процес“, а борците за заштита на човековите права се уште јавно се противат на депортација за бегалци од т,н. „небезбедни земји“, како Авганистан, каде во последниве денови се депортирани стотици мигранти. Против планот е и партијата Левица, според која, проверката на мобилните телефони е нарушување на правото на приватност. Според оваа партија, Владата на Меркел „сака да ги жртвува основните човекови права на олтарот на внатрешната безбедност“.
|