Истражување укажува на нелогични резултати во „Бундес лигата“

Берлин, 24 февруари 2017 (МИА) - Студија спроведена од страна на универзитетот во Билефелд, во соработка со американските универзитети Пенсилванија и Западна Вирџинија, покажува одредени неправилности кога мечеви на фудбалски наптревари биле судени од тројца судии, објави денеска телевизијата ВДР. Сомнителните натпревари кои што ги суделе овие судии се одиграле меѓу 2010 и 2015 година.
Истражувањето на трите универзитети ги следело сумите за обложување за 1.252 меча на „онлајн“ обложувалницата „Бетфер“, пренесува дописникот на МИА од Берлин. Според студијата нема докази за местење натпревари, но во процесот на истражување се утврдени одредени необични сомнителни појави во резултатите на мечевите судени од тројцата судии.
Германската фудбалска федерација (ДФБ) веднаш негираше дека има сомнежи за манипулација во кој било меч на Бундеслигата во последната деценија. Според ДФБ последен случај на местење натпревари во земјата се случил во 2005 година, кога судијата Роберт Хојзер беше казнет со два милиони евра за влијание на резултати од мечеви во интерес на обложувалници.