Берлин, 19 јули 2017 (МИА) - Британскиот принц Вилијам, кој заедно со сопругата Кетрин „Кејт“ Мидлтон престојува во тридневна посета на Германија, денеска во Берлин се сретна со германската канцеларка Ангела Меркел.
Вилијам и неговата сопруга, кои имаат официјални титули војвода и војводка од Кембриџ, по средбата имаа приватен ручек со Меркел во седиштето на германската Влада.
Во текот на разговорот, станало збор за состојбите во европската политика, за повеќе глобални прашања и за добротворната работа.
Вилијам и Кејт во Берлин ги посетиле и Бранденбуршката порта и локалниот Музеј на холокаустот.
Предвидено е младата британска кралска двојка да го посети и градот Хајделберг, стар универзитетски центар во Германија, кој е збратимен со британскиот универзитетски град Кембриџ.
Заедно со принцот Вилијам и неговата сопруга, во Германија се и нивните две деца, младиот принц Џорџ и неговата сестра, принцезата Шарлот.
Вилијам, војводата од Кембриџ, е вториот во редот на претендентите на британскиот престол, веднаш по неговиот татко, принцот Чарлс.
Пред Германија, Вилијам и Кејт беа во посета на Полска.