Рјабков: САД нема да ги укинат санкциите макар и се да исполниме

Москва, 19 јули 2017 (МИА) - САД нема веднаш да ги укине санкциите против Русија макар и Москва да ги исполни барањата на Западот, изјави денеска рускиот заменик министер за надворешни работи Сергеј Рјабков.
- Свесни сме дека тие санкции кои ни се наметнати нема да бидат укинати било што да направиме. Дури и да кажаме дека се согласуваме со се и да носиме бело знаменце. Сенаторите и конгресмените ќе најдат милион изговори за неукинување на било што, истакна Рјабков.
Коментирајќи ги медиумските наводи за наводниот таен состанок на рускиот и американскиот претседател во Хамбург, Рјабков смета дека тие имаат за цел да го поткопаат авторитетот на Доналд Трамп.
- Оние кои го поставуваат тоа прашање на таков начин работат на поткопување на авторитетот на претседателот Трамп и да му создадат дополнителни проблеми, изјави заменик министерот, одговарајќи на прашањето дали претседателот на САД го прекршил дипломатскиот протокол и ја „предал својата земја“ на состанокот со Путин за време на самитот на Г-20 во Хамбург.