Екипа деминери ги деактивирала коланите со експлозиви на напаѓачите во КамбрилсБарселона, 18 август 2017 (МИА) - Шпанската полиција соопшти дека екипа деминери со експлозија ги деактивирала коланите со експлозиви, што ги носеле петмината осомничени напаѓачи во Камбрилс, пренесоа американските медиуми. Претходно полицијата соопшти дека ги убила петмината осомничени напаѓачи при изведувањето на нивниот терористички напад во градот Камбрилс, што се наоѓа на 120 километри јужно од Барселона, а во кој беа повредени петмина граѓани и еден полицаец. Двајца од повредените се наоѓаат во тешка здравствена состојба. Полицијата објаснува дека засега не може да каже на кој начин настрадале повредените граѓани и полицаец во Камбрилс. Локалните медиуми, меѓутоа, јавуваат дека автомобилот со напаѓачите се втурнал во полициско возило, а полицијата притоа ги застрелала напаѓачите, од кои едниот дури и ги нападнал со нож. Исто така, се додава дека осомничените со возилото ги прегазиле повредените граѓани.
|