Рахој: Референдумот е илузијаМадрид, 20 септември 2017 (МИА) - Шпанскиот премиер Маријано Рахој вечерва упати апел до каталонските регионални лидери да се откажат од планираниот референдум за отцепување од Шпанија, бидејќи тоа е спротивно на шпанските закони. - Немојте да одите понатаму со тоа. Вратете се на законот и демократијата. Овој референдум е илузија, изјави Рахој за националната телевизија. Тој ги повика каталонските сепаратисти да ја запрат „ескалацијата на радикализмот и непослушноста“. - Се уште има време да се избегнат поголеми проблеми, посочи Рахој. За време на неговиот говор, илјадници луѓе протестираа во Барселона поради апсењето на каталонските претставници. Шпанската полиција уапси 13 лица во денешните рации извршени во канцелариите на регионалната Влада на Каталонија. Претходно, каталонскиот лидер Карлес Пуџдемон истакна дека Владата на Шпанија де факто вовела вонредна состојба во Каталонија, алудирајќи на низата мерки што шпанската Влада ги презеде за да не се одржи референдумот за независност, што е закажан на први октомври. Тој посочи дека полициските апсења и рации се незаконски и оти имаат за цел да ги спречат граѓаните да излезат на гласање. Уставниот суд на Шпанија го одложи референдумот се додека судиите не ги разгледаат тврдењата на шпанската Влада дека истиот е нелегален.
|