Британската премиерка Тереза Меј синоќа побара посилни мерки против програмата за нуклеарно вооружување на севернокорејскиот лидер Ким Џонг-ил, но и зачувување на меѓународниот поредок и мултилатералните институции.
- Ким продолжува да и пркоси и да ја провоцира меѓународната заедница и да им се заканува на своите соседи. Одлучноста на меѓународната заедница за зацврстување на правилата е посилна од решеноста на Северна Кореја да ги поткопа, истакна Меј во обраќањето на седницата на Генералното собрание на Обединети нации.
Таа ги повика светските лидери да ги бранат правилата засновани на меѓународниот поредок и неговите мултилатерални институции.
Меј предупреди и на многу опасни предизвици со кои се соочуваат земјите-членки на ОН од употребата на хемиско оружје во Сирија против сопствениот народ до тероризмот и апелираше на заеднички напори,
- Верувам дека единствен начин да одговориме на низата предизвици е да се обединиме и да го браниме меѓународниот поредок на чие создавање напорно работевме и на вредностите за кои се залагаме. Основни вредности, кои ги делат членките на ОН се правда, чесност и човекови права, а тие меѓу земјите создадоа заедничка причина за здружено делување за заеднички интерес и за формирање на мултилатерален систем, потенцира Меј.
Говорот на Меј е спротивен на обраќањето на Трамп, кој варијанти на зборовите „суверен“ или „суверенитет“ ги употреби повеќе од 20 пати, а притоа ја воздигнуваше „националната држава“.