Германија ја затвори истрагата за шпионирањето

Германското обвинителство денеска соопшти дека ќе ја затвори истрагата во врска со масовното телефонско прислушување на германски граѓани од британските и американските разузнавачки служби.

Одлуката става крај на шпионскиот скандал, предизвикан од откривањето на поранешниот офицер на американската Агенција за национална безбедност (НСА) Едвард Сноуден, кој ги затегна односите меѓу Берлин и Вашингтон.

Тврдењата од 2013 година дека Агенцијата го прислушувала мобилниот телефон на Ангела Меркел ги вознемирија Германците и ја натераа канцеларката да каже дека шпионирањето меѓу пријатели е целосно неприфатливо.

Во текот на 2015 година се појавија нови тврдења според кои германската разузнавачка служба со години и помагала на американската Агенција да шпионира европски компании и политичари.

Обвинителството во Карлсруе соопшти дека иако на германските разузнавачки служби им биле познати методите што биле користени во прислушувањето од САД, сепак нема докази дека тие биле користени против Германија.