Џорџ Сондерс добитник на Букеровата наградаЛондон, 18 октомври 2017 (МИА) - Американскиот писател Џорџ Сондерс ја освои овогодинешната Букерова награда, со романот „Lincoln in the Bardo“ и така стана вториот Американец кој го добил тоа престижно признание, јави Би-Би-Си. Книгата зборува за тагата на Абрахам Линколн после смртта на синот и посетите на неговиот гроб. „Lincoln in the Bardo“ е прв роман на Сондерс и се случува во текот на една ноќ на гробиштата. Членовите на жирито го пофалија романот како „целосно оригинален“ и „длабоко потресен“. Наградата ја врачи сопругата на британскиот принц Чарлс, војвотката од Корнвол, Камила. - Ви благодарам за оваа голема чест, за која се надевам и натаму ќе ја оправдувам преку останатите мои трудови до крајот на животот, изјави Сондерс при преземањето на наградата. Џорџ Сондерс, досега беше најпознат по кусите раскази, за кои доби повеќе различни награди. Во конкуренција за Букеровата награда беа и британските авторки Али Смит и Фиона Мозли, Американците Пол Остер и Емили Фридланд и британско-пакистанскиот писател Мохсин Хамид. Наградата се доделува за најдобри дела напишани на англиски јазик.
|