Традиционалните божиќни пазари во Германија годинава се со зголемени мерки на безбедност, речиси една година по терористичкиот напад на божиќниот пазар во Берлин, каде беа убиени 12 лица.
- Божиќните пазари се дел од нашиот живот и култура, изјави денеска министерот за внатрешни работи Томас де Мезијер, повикувајќи ги Германците да ги посетат пазарите и да го победат стравот.
Тој истовремено предупреди дека „терористичката закана е висока, во кој било момент и на кое било место“.
Божиќниот пазар во Берлин, каде што туниски напаѓач влета со камион меѓу посетителите на 19 декември минатата година, ќе биде отворен вечерва, по пригодна церемонија и со свеќи.
Предвидено е берлинскиот пазар на годишнината од нападот да биде затворен.
Божиќните пазари во Германија се опколени со бетонски блокови за да се спречат евентуални напади со возила. Полицијата ќе биде присутна во зголемен број.