Министерот за надворешни работи на Германија Зигмар Габриел изјави дека „соединети европски држави“ предложени од неговиот партиски лидер Мартин Шулц нема да значи и крај на националните држави на европскиот континент.
На партискиот конгрес одржан минатата недела, Шулц рече дека државите кои ќе одбијат до 2025 година да потпишат договор со кој се основаат федерални „соединети европски држави“, треба да ја напуштат Европската унија.
Во изјава за А-Ер-Де, Габриел нагласил дека таа идеја „не е во противречност со Европа како татковина“. Габриел додал дека европските нации не може сами да ги бранат своите интереси на глобалната сцена.
- Доколку не застанеме сите заедно, гласот на нашите деца нема да се слушне во светот, изјави Габриел.