Германската канцеларка Ангела Меркел е добитничка на првата Меѓународна награда за придонес за еднаквост на половите. Наградата ја доделува Владата на Финска, со цел да се интензивира еднаквоста помеѓу мажите и жените и во чест од 100-годишнината од независноста на Финска.
- Канцеларката Меркел стана една од највлијателните личности во светот и е пример за многу жени и девојки. Еднаквоста е основна вредност за Финска, која во 1906 година стана првата земја во светот, која им даде целосни политички права на жените, изјави финскиот премиер Јуха Сиполе на маргините на Самитот на ЕУ.
Тој додаде дека Меркел е наградена поради нејзините заложби за полова рамноправност на средбите со светските лидери и напорите за подобрување на правата и можностите на жените, посебно во земјите во развој.
За Меѓународната награда за заштита на еднаквоста помеѓу половите предвиден е и премија од 150.000 евра. Но, сумата нема да ја добие Меркел, туку таа треба да одлучи на која организација, што се залага за рамноправност на половите, ќе ги добие парите. Добитникот на парите ќе биде објавен 2018 година.
Во 1906 година Финска имаше статус на автономно големо кнежевство во руската империја, а во 1917 година станува независна држава.