Поранешниот каталонски премиер Карлес Пуџдемон, кој по прогласувањето независност на Каталонија побегна во Белгија, разгледува различни нестандардни начини да се врати во Шпанија, за одново да ја преземе функцијата претседател на регионалната Влада во Барселона, објави денеска весникот „А-Бе-Се“.
Повикувајќи се на политичари блиски до каталонскиот лидер, весникот тврди дека поради важечката потерница за Пуџдемон на територијата на Шпанија, тој размислува на кој начин може да се појави во државата.
Тој ја разгледува и можноста да влезе во земјата скриен во багажник на автомобил или маскиран и под туѓо име. Размислувал и да помине по планински патеки или скриен на чамец.
Пуџдемон смета на помош од некои луѓе во каталонската полиција, кои, како што се надева, нема да му забранат да влезе во регионалниот Парламент на денот на изборот на нов претседател на Владата на Каталонија.
Тој очекува дека ако биде избран на оваа функција, шпанските власти нема да се осмелат да го уапсат и да го стават во притвор, а ако сепак одлучат да преземат такви мерки - дека Европа нема да ги поддржи, додава мадридскиот весник.