Поранешниот руски двоен шпион осуден за предавство во Москва е во критична состојба во британска болница откако беше изложен на непозната материја, додека полицијата тврди дека е можно да станува збор за „државна закана“.
Во првата реакција, Кремљ соопшти дека е подготвен да соработува доколку Британија побара помош во истрагата за оваа „трагична ситуација“.
Сергеј Скрипал, некогашен полковник на руската воена разузнавачка служба ГРУ, доби дозвола за престој во Британија откако во 2010 година беше разменет за руски шпиони уапсени на Запад во рамките на размена на шпиони на писта на виенскиот аеродром.
Поранешниот 66-годишен шпион и 33-годишна жена во неделата беа пронајдени во бессознание на клупа во трговски центар во англискиот град Сализбури откако биле изложени на непозната материја. Би-Би-Си јави дека жената всушност е 33-годишната ќерка на Сергеј, Јулија Скрипал.
Двајцата се во критична состојба и се наоѓаат на интензивна нега.
Иако британските власти соопштија дека нема ризици за јавноста, полицијата го опколи местото каде беа пронајдени, како и пицеријата „Зижи“ во центарот на Сализбури.