Рускиот претседател Владимир Путин и натаму смета дека за Русија е подобро да ги унапреди односите со другите земји и покрај одлуката за протерување на десетина западни дипломати, како реакција на мерките што ги презеде Западот поради труењето на поранешниот руски агент Сергеј Скрипал и неговата ќерка Јулија во Велика Британија, изјави денеска потпаролот на Кремљ, Дмитриј Песков.
Песков нагласи дека не се согласува со оцената на Администрацијата на САД дека одлуката на Русија за протерување на 60 американски дипломати укажува дека Москва не е заинтересирана за дипломатија.
Белата куќа претходно оцени дека одлуката на Москва за протерување на 60 американски дипломати била очекувана и дека тој потег „претставува понатамошно влошување на односите меѓу САД и Русија“.
- Одговорот на Русија не е неочекуван и САД ќе се справат со тоа, соопшти синоќа Белата куќа.
Протерувањето на 60-те американски дипломати од Москва, претставува одговор на претходната одлука на Вашингтон за протерување на 60 руски дипломати од САД во знак на солидарност со Велика Британија поради труењето на Скрипал и неговата ќерка.
Во знак на солидарност со Лондон над 25 земји од своите територии протераа вкупно над 150 руски дипломати.