Во Кичево има донесено решенија за рушење на дивоградби, но нема извршители

Кичево, 2 март (МИА) - Градежните инспектори во општина Кичево во текот на минатата година донесoa 84 решенија за рушење на дивоградби и 39 решенија за прекинување на понатамошна изградба на објектите, но нема извршна служба која би ги реализирала овие решенија.

Раководителот на општинскиот инспекторијат Зоран Никодиноски вели дека неговите инспектори си ја вршат работата, меѓутоа проблем е тоа што општината до скоро немала склучено договор со фирма која би учествувала во рушењето на објектите што се дивоградби.

- Потребна е механизација, средства, вработени лица, а ние сето тоа го немаме. Советот и општината треба да ни го овозможат тоа за да може да работиме, вели Никодиноски.

Градежните инспектори при инспекцискиот надзор наредувале прекинување на изградбата, отстранување на градбата и други работи кои имале за цел да се спречи појавувањето на дивоградби. Тие имаат 87 решенија испратени на извршување, а само осум од објектите почнати како дивоградби добиле законска легализација.