|
 |
Вести / Европа
|
|
Молдавски министер предложи широка автономија за Придњестровје
Кишињев, 4 јули (МИА) - Молдавскиот министер за реинтеграција Василе Шова во вторникот предложи да и се дозволи широка автономија на отцепената област Придњестровје, како решение за еден од најзамрсените замрзнати конфликти во светот.
Рускојазичното Придњестровје се отцепи од романскојазичната Молдавија по граѓанската војна која заврши во 1992 година. Од 1994 година се водат преговори за нивно обединување, кои повеќе пати завршуваа без решение поради несогласувањата меѓу Кишињев и Тираспол за правата на Придњестровје под суверенитетот на Молдавија доколку областа се врати под молдавска контрола.
Шова, кој е и главен преговарач од страна на комунистичката Влада во дијалогот по ова прашање, во вторник во еден весник предложи широки права на самоуправување за Придњестровје, како и други сериозни отстапки од страна на Молдавија, во замена за брзото обединување.
- Придњестровје треба да има статус на самоуправна република со сопствен устав, судски систем и полиција, и да има право да се одвои од Молдавија во одредени ситуации, изјави Шова.
Предлогот на Шова вклучува и уставна промена, која ќе гарантира меѓународна неутралност на Молдавија, со што се исклучува приклучувањето кон НАТО во иднина, како и целосна демилитаризација.
„Проектот за дискусии“, како што Шова го нарекува списокот со своите предлози, вклучува и уставни гаранции за придњестровските индивидуални и колективни права на цела територија на Молдавија и гарантирани 20 проценти од местата во Парламентот за придњестровските пратеници.
- Ако областа го прифати планот за обединување, молдовскиот Парламент, во кој мнозинството го има владејачката Комунистичка партија на претседателот Владимир Воронин, ќе ги одобри уставните и законските промени за еден месец, вети министерот за реинтеграција.
Сензационалниот предлог на Шова доаѓа неколку дена откако Воронин во интервју за шпанскиот весник „Паис“ го повика рускиот претседател Дмитриј Медведев да се приклучи во решавањето на придњестровското прашање, „што ќе му ги обезбеди на меѓународната сцена ловорите на лидер, кој е способен да решава меѓународни конфликти“.
Во моментов во отцепената територија се распоредени 3.000 руски војници. Кремљ вети дека ќе ги повлече сите свои војници од Придњестровје до крајот на 2003 година, но тоа не го направи со образложение дека регионот е премногу нестабилен за ра си заминат руските воени сили.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|