Вести / Европа
„Фајненшл тајмс“: Владимир Путин ја „задушува“ работата на невладините организации
Лондон, 4 јули (МИА) - Владата на рускиот премиер Владимир Путин продолжува со политиката на „задушување“ на невладините организации во земјата, воведувајќи нови мерки против нивното дејствување, пишува „Фајненшл тајмс“.
Како што јави дописникот на МИА од Лондон, весникот вели дека деновиве руската Влада одлучила бројот на невладините организации во Русија, што може да примаат донации од странство, а да не плаќаат данок, е сведен на само 12, од преку стотина, колку што беа досега.
Реагирајќи на таквата одлука, невладините организации во заедничко соопштение издадено во Москва, тврдат дека мерките на премиерот Путин се „политички обоени“ и се само продолжување на политиката што тој ја спроведуваше и кога беше претседател на Русија.
Лондонскиот весник забележува дека додека Путин беше руски претседател, невладините организации во земјата беа под силен удар на властите, обвинувани дека работат против интересите на државата, дека служат на интересите на „непријателски“ настроената опозиција, како и тоа дека се само „прикрино орудие“ на странските разузнавачки служби.
Претставник на Владата во Москва, за „Фајненшл тајмс“ вели дека со новите мерки се настојува само да се воспостави ред во работењето и дејствувањето на овие организаци, демантирајќи дека тоа е направено од политички причини. Но, луѓето од невладиниот сектор ја обвинуваат Владата дека сега нивното работење е уште повеќе ограничено.
Според лондонскиот весник, голем број невладини организации најавуваат дека ќе се повлечат од Русија, затоа што не сакаат 25 отсто од приходите, колку што изнесува новата даночна стапка за овој сектор, да ги уплаќаат на државната каса.
|
|