|
 |
Вести / Европа
Лондонскиот „Њуз оф д ворлд“ го загуби спорот со претседателот на Меѓународната автомобилска федерација
Лондон, 24 јули (МИА) - Најтиражниот британски неделник„Њуз оф д ворлд“ го загуби судскиот спор со претседателот на Меѓународната автомобилска федерациа (ФИА) Макс Мозли, откако судијата на Вишиот суд во Лондон пресуди весникот да му исплати 60 илјади фунти отштета, поради повреда на приватноста.
Како што јави дописникот на МИА од Лондон, весникот во март оваа година објави голема сензационалистичка сторија за „сексуалната садо-мазохистичка оргија“ во станот на Мозли, збогатена со повеќе тајно снимени фотографии, за која тврдеше дека имала „нацистичко обележје“ и исто такви постпаки.
Појавувањето на сторијата, чии снимени видео делови беа веднаш ставени на Интернет, предизвика сензација во британската јавност и остри критики против Мозли. Тој беше повикан да поднесе оставка од функцијата во светскиот автомото спорт, а повеќе поранешни британски возачи на Формула 1 се согласија дека после откритијата на „Њуз оф д ворлд“, тој повеќе не може да раководи со ФИА.
Тоа предизвика Меѓународната автомобилска федерација да свика вонредна седница во Париз пролетва, на која се гласаше за довербата на Мозли. Со убедливо мнозинство, тој ја доби довербата на членовите на ФИА и најави тужба против весникот, обвинувајќи го дека му го уништил живототот, објавувајќи детали од „една приватна забава“.
Во текот на судењето Макс Мозли (68) призна дека во неговиот лондонски стан се одржала забава, на која биле повикани неколку лондонски проститутки, но дека немало никакви „нацистички оргии“.
Главниот уредник на весникот Колин Мајлер кој се согласил една од проститутките да оди на забавата озвучена и снабдена со малечка видео камера, се бранеше дека верувал оти постои „легитимен јавен интерес“ и правна основа за објавување на материјалот, што го добиле од тајното снимање.
- Мислевме дека гледаме снимки од нацистичка сексуална оргија, изјави главниот уредник.
Судијата утврди дека немало нацистичка оргија и дека не постоел јавен интерес за известување од домашна сексуална оргија, па пресуди отштета што е многу поголема од онаа што во претходните вакви спорови ја добија Наоми Кемпбел или Катерина Зита Џонс и Мајкл Даглас.
Макс Мозли е син на Освалд Мозли, голем почитувач на германскиот нацизам во триесетите години на минатиот век и претседател на британската фашистишка партија пред почетокот на Втората светска војна.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|