|
 |
Вести / Европа
|
|
Tрет пораз на британските лабуристи на вонредните избори за пратеник во Вестминстер
Лондон, 25 јули (МИА) - Британските лабуристи доживеаја трет едноподруго пораз на вонредните избори за едно испразнето пратеничко место, овојпат во источен Глазгов, каде кандидатот на Шкотската националистицка партија (СНП) Џон Мејсон го победи лабуристичкиот противкандидат за само 350 гласови повеќе.
Како што јави дописникот на МИА од Лондон, оваа изборна единица досега важеше за „цврсто упориште“ на лабуристите, на кое гласачите по традиција им се наклонети, па се очекуваше дека и покрај сериозно разнишаниот рејтинг, партијата на премиерот Гордон Браун ќе успее да го помине овој тест.
Губењето и на уште едно пратеничко место, претставува нов тежок удар за партијата и за нејзиниот лидер. На последното гласање за британскиот Парламент, во мај 2005 година, тогашниот лабуристички лидер Тони Блер успеа да обезбеди предност пред СНП од преку 13.500 гласови и да ја направи оваа изборна единица, трето најсигурно место на територијата во Шкотска.
Вчерашното гласање беше спроведено затоа што досегашниот лабуристички пратеник Дејвид Маршал поднесе оставка, од како што беше речено, здравствени причини.
Лабуристите годинава покрај губењето на местото градоначалник на Лондон, ги загубија пратеничките места и во изборните единици во Крју и во Нанвиц и Хенли, предизвикувајќи на тој начин за драстичниот пад на довербата на партијата кај Британците.
Министерот во британската Влада Даглас Александар, кој беше одговорен за кампањата во Шкотска, го призна поразот и изјави дека резултатот од броењето на гласовите е „длабоко разочарувачки“.
Новиот британски пратеник Мејсон изјави дека победата е „глас на доверба за Шкотска, за шкотската Влада и за напредокот што го прави СНП“.
Во еуфорицната атмосфера што настана по соопштувањето на резултатите, Мејсон изборниот резултат го оквалификува како порака на Шкотланѓаните до Даунинг стрит 10, додека заменик лидерот на партијата Никола Стардзин изјави дека „победата во источен Глазгов има епски размери“. СНП која има минимално мнозинство во локалниот шкотски парламент од само еден пратеник, со малцинска влада управува со Шкотска од мај минатата година. Партијата и нејзиниот лидер Алекс Салмонд заговараат референдум за независност и отцепување на Шкотска од Велика Британија.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|