|
 |
Вести / Европа
|
|
Гордон Браун ги обвини исландските власти за колапсот на нивните банки
Лондон,10 октомври (МИА) - Британскиот премиер Гордон Браун ги обвини властите во Исланд за колапсот на тамошните банки и за пропустот да ги гарантираат депозитите на британските штедачи, оквалификувајќи го дејствувањето на исландските власти како "всушност нелегално" и "целосно неприфатливо".
Во интервју за Би Би Си, британскиот премиер откри дека во телефонскиот разговор со претседателот на исландската Влада Геир Харде му забележал дека тамошните финансиски власти ги изневериле и ги измамиле како исландските, така и британските граѓани.
Како што пренесува дописникот на МИА од Лондон, Браун потврди дека Владата во Лондон ги замрзнала имотот и средствата што компаниите и банките од Исланд го имаат во Велика Британија, заканувајќи се со нови мерки за да се повратат британските пари што сега се заробени.
Премиерот на Исланд Харде во изјавата за Би Би Си рече дека се уште не може да поверува дека за заробување на исландскиот имот биле користени одредбите на законот за антитероризам и порача дека тој се уште верува во можноста новонастанатите состојби да се решаваат низ преговори.
Британските медиуми тврдат дека речиси 20 милијарди фунти "британски пари" на компаниите, на околу 300 илјади штедачи и на преку 20 општински совети и уште повеќе комунални фирми, се заробени со колапсот на неколку исландски банки.
Најголемиот дел од британските депозитори се врзани за интернет банката Ајссејв, која во Британија работеше како филијала на исландската банка Ланџбанки што прва беше национализирана од Владата во Рејкјавик.
Британскиот министер за финансии Алистер Дарлинг, вети дека Владата ќе ги гарантира целосно заштедите на британците во Ајссејв, но одби тоа да го потврди и за општинските совети, за полицијата и транспортните фирми врзани со општините, за кои Гардијан тврди дека имаат вложено 1 милијарда фунти во исландските банки.
Делегација на британското Министерство за финансии отпатува утринава за Рејкјавик на разговори за тоа како Велика Британија да ги поврати своите пари, во атмосфера која се опишува како вистинска "студена војна", каква што земјата немала со никого со децении на ред.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|