Терористите од бомбашките напади во Лондон и Глазгов тврдат дека немале намера да предизвикаат експлозии од поголеми размери
Лондон, 10 октомври (МИА) - Терористите од бомбашките напади во Лондон и Глазгов, извршени со помош на автомобили-бомби, на 29 јуни и на 1 јули минатата година, тврдат дека немале намера да предизвикаат експлозии од поголеми размери, но обвинителот на судењето во Лондон на Биал Абдула и Мохамед Асе, тврди дека нивните намери биле да изведат неколку напади во британскиот главен град и подоцна во Шкотска, со големи разурнување и бројни човечки жртви, јави дописникот на МИА од Лондон.
Според обвинителот во процесот Џонатан Леидло, првообвинетиот Абдула и Кафел Ахмед, кој почина од изгореници по нападот со запален џип во зградата на аеродромот во Глазгов, оставиле во 01:30 часот по полноќ, мерцедес пред лондонскиот ноќен клуб "Тајгер-тајгер" во строгиот центар на градот и во близината на автобуска станица на која во секое време има многу луѓе. Малку подоцна, уште едно такво возило оставиле и во блиската споредна улица, во близината на ноќниот клуб.
И во двата автомобили имало наместено боци со гас, нафта и бензин, како и преку 900 шајки, кои при активирањето на експлозивната направа, со распрснување на сите страни требало да предизвикаат уште повеќе мртви и ранети луѓе.
Големата експлозија, како што се вели во обвинението е избегната на време, откако по еден инцидент со гостин во ноќниот клуб, луѓето од Брзата помош забележале како од мерцедесот излегува слаб чад и се шири силна миризба на бензин. Ја повикале полицијата, која во автомобилот ја открила пеколната направа за изведување на операциите автомобил-бомба и која потоа го блокира целиот центар на Лондон, трагајќи по уште такви автомобили.
Возилото што беше најдено во споредната улица, следниот ден беше уништено со контролирана експолозија, а полицијата тргна во потрага по терористите.
Во ноќниот клуб во моментот на откривањето на возилата имаше преку 550 гости.
Во Судот беше откриено дека по оставањето на возилата, двајцата терористи со помош на рикша возилата, што во Лондон обично ги користат туристите, избегале од центарот и одново се состанале на Еџвер роуд улицата, целата полна главно со продавници, ресторани и чајаџилници на домашните муслимани.
На метро страницата во оваа улица на 7 јули 2005 година беше извршена една од четирите експолозии на бомбашите самоубијци во лондонското метро. По неуспехот да се покрене механизмот во двата автомобили бомба, терористичката група се префрлила во Глазгов, настојувајќи таму да предизвика експолозија со големи последици.
Терористите во британските медиуми се означуваат како „бомбаши лекари“, затоа што во Британија беа на медицинска специјализација.
|